अमरावती सहायक पोलीस उपनिरीक्षक यांची हत्या.
अमरावती:अमरावतीतील सहायक पोलीस उपनिरीक्षक अब्दुल कलाम अब्दुल कादर असं हत्या करण्यात आलेल्या पोलीस अधिकाऱ्याचं नाव आहे. कलाम यांच्या टू व्हिलरला आरोपीने आधी फोर व्हिलरने धडक दिली. त्यानंतर त्यांच्या पोटावर आणि छातीवर धारधार शस्त्राने सपासप वार करण्यात आले. घटना घडल्यानंतर हल्लेखोर फाजील खान घटनास्थळावरुन पसार झाला होता. या घटनेनंतर संपूर्ण पोलीस विभागसह अमरावती शहरात एकच खळबळ उडाली होती. दरम्यान, पोलिसांनी या प्रकरणाचा तपास सुरू करत आरोपीचा शोध घेतला असता त्याला ख्वाजानगरमधून जखमी अवस्थेत ताब्यात घेण्यात आलं. सध्या त्याच्यावर खाजगी रुग्णालयात उपचार सुरू आहे. मात्र या हत्येमागचे नेमकं कारण काय? हे अद्याप समोर आलं नाही. दुसरीकडे एका पोलीस अधिकाऱ्याचीच अशा पद्धतीने हत्या करण्यात आल्यानंतर सर्वसामान्यांची सुरक्षा कशी करणार? असा प्रश्न उपस्थित केला जात आहे.
